Альманах “Жэўжык”

У альманаху вы знойдзеце:
цікавыя моўныя заданні;
рэбусы, блытанку, словаловы;
шыфроўку;
вясёлую матэматыку ды англійскую мову;
майстар-класы і эксперыменты;
цікавую гульню-хадзілку!

У свет ужо выйшла 6 нумароў. Пяць электронных: “Гуканне вясны”, “Вялікдзень”, “Дрэвы”, “Водная сістэма Беларусі” і “Зімовыя святы”. У снежні 2020 году з’явіўся першы друкаваны наклад (1000 асобнікаў) на тэму “Родная мова”. У лістападзе 2021 году быў надрукаваны другі нумар альманаха пра музычныя інструменты.

Тут можна паглядзець і спампаваць бясплатныя электронныя нумары альманаха “Жэўжык”.


Першы нумар быў вельмі простым па вёрстцы і ўсяго на 20 старонак. Прывітальнае слова да чытачоў – ад імя беларускага хлопчыка з незвычайным імем Жэўжык. Амаль усё ў альманаху прысвечана тэме птушак і вясны ў Беларусі: расказ пра першых птушак, што вяртаюцца да нас і што такое вырай; крыжаванка, майстар-клас па лепцы, папяровая самаробка, рэбус, галаваломка. А яшчэ рэцэпт незвычайнай кашы. Далей будзе болей, будзе весялей! 😉

Першы нумар спампаваць можна тут 👉 Гукаем вясну разам!

Другі нумар на 20 старонках змяшчае багата пазнавальных матэрыялаў пра адметнасці нашага Вялікадня: валачобніцтва, васолы, гульні ў біткі і пакатушкі. З’явілася новая рубрыка, што будзе пастаяннай надалей, – “Слоўнік юнага дойліда”. На яе старонках чытачы будуць знаёміцца з выбітнымі будынкамі беларускай архітэктуры. Пачалі з нясвіжскага касцёла Божага Цела. Да велікоднай тэмы яшчэ падрыхтаваны парады па фарбаванні яек і разнастайныя забаўкі (комікс, лабірынт, знаходкі, рэбусы, галаваломка).

Спампаваць другі нумар можна тут 👉 Рыхтуемся да Вялікадня

“Летні”, трэці нумар прысвечаны дрэвам. У альманаху ўжо можна пабачыць намаляванага галоўнага персанажа. Дызайн выдання заўважна палепшыўся, а аб’ём вырас да 32 старонак. У гэтым нумары можна прачытаць пра тое, як захаваць нашы лясныя скарбы. Дазнайцеся, як назваць розныя часткі дрэва, і зазірніце пад яго кару. Правядзіце цікавы эксперымент. Пазнаёмцеся з адным з самых старых драўляных будынкаў Беларусі. Забаўкі па тэме: словаловы, судоку, блытанка, майстар-клас. Жэўжыку прыйшлі першыя пытанні ад чытачоў, на якія ён даў адказ. Яшчэ адна навінка – старонка англійскай мовы.

Спампаваць трэці нумар можна тут 👉 Дрэвы


Чацвёрты нумар “да дна” раскрывае тэму “Водная сістэма Беларусі”. А пад вокладкай размешчаны: дзівосныя фотаздымкі беларускай прыроды ад Віктара Малышчыца; “Нашы рэкі і вадаёмы: міфічныя і рэальныя”; легенды і пабудова вадзянога млына; незвычайная шыфроўка пра таямнічае беларускае мора; водны эксперымент, адказы на пытанні чытачоў, загадкі пра ваду, пастаянныя забаўкі, старонка англійскай мовы. З’яўляецца першая гульня-хадзілка “Плывём з варагаў у грэкі”. Новая рубрыка “Вясёлая матэматыка”. І першы святочны конкурс, які прайшоў з добрымі прызамі ад беларускіх выдавецтваў.

Спампаваць чацвёрты нумар можна тут: 👉Водная сістэма Беларусі

Пяты нумар з’явіўся зімой і, канечне, расказвае пра зімовыя святы. На старонках “Жэўжыка” вашы дзеці ўбачаць, што матэматыка можа быць вясёлай, а англійская мова святочнай і навагодняй! У гэтым нумары вы і вашы дзеці даведаецеся: як са шкарпэткі можа атрымацца снегавік, зможаце зрабіць штучны снег дома, прыгатуеце імбірнае печыва, пагуляеце ў гульню ўсёй сям’ёй, а таксама знойдзеце мора цікавостак, забавак, заданняў!!

Пампуйце наш зімовы нумар вось тут 👉Зімовыя святы

У снежні 2020 года мы выдалі шыкоўны дзіцячы альманах “ЖЭЎЖЫК” — першы друкаваны альманах прысвечаны беларускай мове. На калядныя і навагоднія святы амаль адразу ўвесь наклад раскупіўся.
На 36-ці поўнакаляровых старонках вялікага фармату, якія надрукаваныя на шчыльнай крэйдаванай паперы, дзеці знойдуць: цікавыя моўныя заданні, крыжаванкі, рэбусы, цікавінкі, вясёлую матэматыку, майстар-класы па вырабу ўпрыгожванняў і па кулінарыі, гульню-хадзілку і шмат-шмат цікавага!
Набыць можна тут Інтэрнэт-кнігарня Knihi.by


У лістападзе 2021 года мы выдалі “ЖЭЎЖЫК. МУЗЫЧНЫЯ ІНСТРУМЕНТЫ” — альманах прысвечаны музычным інструментам. На 52-х поўнакаляровых старонках вялікага фармату, якія надрукаваныя на шчыльнай крэйдаванай паперы, дзеці знойдуць: цікавыя моўныя заданні, крыжаванкі, рэбусы, цікавінкі, вясёлую матэматыку, майстар-класы па вырабу музычных інструментаў і па кулінарыі, гульню-хадзілку, комікс і шмат-шмат цікавага! Набыць можна тут Інтэрнэт-кнігарня Knihi.by
Паслухаць, як гучыць:
Дуда
Колавая ліра
Дудачка, жалейка

У снежні 2022 года з’явіўся новы творчы сшытак на 36 старонках з заданнямі, цікавінкамі і незвычайнымі фактамі!! З такім сшыткам можна файна бавіць час халодным зімовым вечарам як дзеткам, так і дарослым! Зімовы сшытак ад Жэўжыка цудоўны творчы падарунак для кожнага! Каб набыць, трэба напісаць на электронную пошту belskolka@gmail.com.

Scroll to Top